BLACKPINK's Jisoo ကတော့ နာမည်ကြီးအဆိုတော်အဖြစ်ကနေ သရုပ်ဆောင်လိုင်းဖက်ကို ကူးပြောင်းလာသူဖြစ်ပြီး Snowdrop, Newtopia လိုမျိုး ဇာတ်လမ်းတွဲတွေမှာ အဓိကဇာတ်လိုက်မင်းသမီးအဖြစ် သူမရဲ့ အနုပညာလက်စွမ်းကို ပြသထားခဲ့သူလေး‌ဖြစ်ပါတယ်။ Idol တစ်ဦးဖြစ်တာကြောင့် သရုပ်ဆောင်ပိုင်းနဲ့ပတ်သက်ပြီး ပရိသတ်တွေရဲ့ ကွဲလွဲတဲ့ထင်မြင်ချက်တွေ အများကြီးရှိခဲ့ပေမဲ့ Jisoo ကတော့ သူမမြတ်နိုးရာကို ရဲဝံ့စွာ ဆက်လက်လုပ်ကိုင်နေစဲပါ။ သရုပ်ဆောင်ခြင်းကို စတင်လိုက်တဲ့အချိန်ကစပြီး ဘဝအတွက် အရေးကြီးတဲ့သင်ခန်းစာတစ်ခုကို သင်ယူရရှိခဲ့ကြောင်း Vogue Korea နဲ့ အင်တာဗျူးမှာ ပရိသတ်များထံ မျှဝေပေးခဲ့ပါတယ်။

ဇာတ်လမ်းရိုက်ကူးရင်း လူပေါင်းများစွာနဲ့ ဆုံတွေ့ခဲ့ရတာကြောင့် လောကကြီးကိုဖြတ်သန်းဖို့ အမြင်ကျယ်သွားခဲ့ကြောင်း ပြောပြခဲ့ပါတယ်။ Jisoo က “ရိုက်ကူး‌ရေးလုပ်ရင်းနဲ့ လူသစ်‌တွေအများကြီးနဲ့ ဆုံတွေ့ခဲ့ရပါတယ်။ ကျွန်မသိလိုက်ရတာတစ်ခုကလေ... ကျွန်မအတွက် ပုံမှန်လိုဖြစ်နေတဲ့အရာတွေက တချို့လူတွေအတွက်တော့ ဖြစ်ပျက်နေကျမဟုတ်တဲ့ အစိမ်းသပ်သပ်လိုမျိုး ခံစားရတာတွေရှိပါတယ်။ နယ်ပယ်မတူပေမဲ့လည်း အတွေးတွေနဲ့ အခက်အခဲပြဿနာတွေကတော့ ကျွန်မနဲ့ တူနေတာမျိုးတွေ ရှိတယ်။ ဒီလိုဆိုတော့ ကျွန်မအတွက် လောကကြီးကို ကြည့်ရှုတဲ့အမြင်က နည်းနည်းလေးပိုပြီး ကျယ်ပြန့်လာသလိုပါပဲ။ သရုပ်ဆောင်ပြီဆိုကတည်းက ကိုယ့်ကိုကိုယ် နံပါတ် ၁ နေရာမှာထားပြီး ဦးစားပေးတတ်ဖို့ကို သဘောပေါက်လာခဲ့တယ်။ အများကြီးလည်း တွေးဖြစ်လာသလို ‘အခုချိန်မှာ ငါလိုအပ်နေတာ ဘာလဲ?’ ဆိုပြီးတော့လည်း ကိုယ့်ကိုကိုယ် ခဏခဏမေးဖြစ်ရင်း နှလုံးသားရဲ့ခံစားချက်ကို ကိုယ်တိုင် အဖြေထုတ်ဖြစ်လာပါတယ်။ ပိုကောင်းတာကတော့ ကိုယ့်ကိုကိုယ် ပိုမိုကောင်းမွန်တဲ့သူဖြစ်လာအောင် ပြုစုစောင့်ရှောက်တတ်လာတာပါပဲ။ အရာအားလုံးထက် ကိုယ့်တန်ဖိုးကိုသိပြီး ပိုမိုတန်ဖိုးထားတတ်လာအောင် သင်ယူခဲ့ရပါတယ်။ ဒီဘဝသင်ခန်းစာကတော့ ကျွန်မအတွက် အဖိုးမဖြတ်နိုင်တဲ့ အကောင်းဆုံးသိရှိချက်ပါပဲ" ဆိုပြီး သူမရဲ့ ကိုယ်တွေ့သင်ခန်းစာလေးကို မျှဝေခဲ့တာပါ။

Photo credit to OSEN

Jisoo ပြောသလို ကိုယ့်တန်ဖိုးကို ကောင်းစွာသိရှိနားလည်ပြီး နှလုံးသားရဲ့လိုအင်ဆန္ဒတွေကို ဖြည့်ဆည်း‌တတ်ဖို့က ဘဝကြီးအတွက် အရေးကြီးဆုံးပါပဲ။ ကမ္ဘာ်ကျော်အမျိုးသမီးတေးသံရှင်အနေနဲ့ ပွဲဦးထွက်ခဲ့ပြီး အနုပညာအလုပ်တွေကို တစိုက်မတ်မတ်လုပ်နေတဲ့ Jisoo ကတော့ သရုပ်ဆောင်ရင်းနဲ့ ရရှိခဲ့တဲ့သင်ခန်းစာတွေကိုလည်း ပရိသတ်များ အကြံရအောင် မျှဝေပေးထားခဲ့ပါတယ်။

Source: Koreaboo