'Omniscient Reader: The Prophet' ဇာတ်ကားကတော့ မထွက်ခင်ကတိုင် ဇာတ်ကောင်တွေအတွက် သရုပ်ဆောင်ရွေးချယ်မှုနဲ့ပတ်သက်ပြီး ဝေဖန်ခြင်းတွေအများကြီး ရှိခဲ့ပါတယ်။ အထူးသဖြင့် BLACKPINK's Jisoo ဟာ ဇာတ်ကောင် Lee Ji Hye နေရာက သရုပ်ဆောင်ထားပြီး သူမကိုင်ဆောင်တဲ့ လက်စွဲတော်ကလည်း မူရင်းဖန်တီးမှုနဲ့မတူတော့တာကြောင့် ထောက်ပြပြောဆိုကြတာပါ။ Jisoo ကို ထည့်သွင်းရိုက်ကူးခြင်းနဲ့ပတ်သက်ပြီး ဒါရိုက်တာ Kim Byung Woo က ရှင်းလင်းတဲ့ ‌‌အဖြေကို ထုတ်ပြောခဲ့ပါတယ်။

ဒါရိုက်တာကြီးကတော့ ဇာတ်ကောင်ကို လူသိများအာရုံစိုက်မှုရစေချင်တာကြောင့် Jisoo လို ကမ္ဘာကျော်ကို ထည့်ရိုက်ရတာဖြစ်ကြောင်း ‌ဖြေပါတယ်။ "Jisoo ရဲ့ ဇာတ်ကောင်က ရုပ်ရှင်ထဲမှာ နောက်ကျမှပေါ်ထွက်လာတာပေါ့နော်။ ဒါပေမဲ့ မူရင်းဝတ္ထုထဲမှာတော့ Lee Ji Hye ဆိုတဲ့ ကာရိုက်တာ,က တကယ်ကို အရေးပါပြီး ဇာတ်လမ်းတစ်လျှောက် ပြောင်းလဲတိုးတက်မှုတွေ အများကြီးရှိတဲ့ ဇာတ်ကောင်ပါ။ ရုပ်ရှင်ရဲ့ဇာတ်အသွားအလာအရ ဒီဇာတ်ကောင်ကို အစောကြီး ထုတ်ပြလို့ မဖြစ်ပါဘူး။ ဒါကြောင့် လူသိများတဲ့သူတစ်ယောက်ကသာ Lee Ji Hye အဖြစ် သရုပ်ဆောင်မယ်ဆိုရင် ရုပ်ရှင်အတွက် အရေးကြီးတဲ့ ဇာတ်ကောင်မှန်း ကြည့်ရှုသူတွေက သဘောပေါက်ပြီး စိတ်ထဲ စွဲသွားလိမ့်မယ်လို့ ထင်ခဲ့ပါတယ်။ Jisoo ကို ဒီဇာတ်ကောင်အဖြစ် ထည့်ရိုက်လို့ ဝေဖန်မှုတွေ ရှိတယ်ဆိုတာ ကျွန်တော် သိပါတယ်။ ဒါကလည်း Jisoo ကို ရွေးချယ်ခဲ့တာ မှန်ကန်ကြောင်း သက်သေပြနေတာပါပဲ။"

"Lee Ji Hye ဇာတ်ကောင်ကို တခြားမင်းသမီးတစ်ယောက်သာ သရုပ်ဆောင်ခဲ့မယ်ဆိုရင် ပရိသတ်တွေက ဒီဇာတ်ကောင်က ဘာလဲဆိုတာကို မှတ်မိမှာတောင် မဟုတ်လောက်ပါဘူး။ မူရင်းဝတ္ထုထဲမှာပါတဲ့ လက်စွဲတော် ပစ္စည်းကို ပြောင်းပစ်လိုက်တာလည်း လိုအပ်တယ်ထင်လို့ ပြောင်းလိုက်တာပါ" ဆိုပြီး ဖြေပေးထားပါတယ်။

တကယ်လို့ အခွင့်အရေးရပြီး ဇာတ်လမ်းအဆက် ထပ်ထွက်ဖြစ်နိုင်မယ်ဆိုရင် နတ်ဘုရားတွေရဲ့ နောက်ခံသမိုင်းကြောင်းတွေကို အသေးစိတ် ရိုက်ပြတဲ့ ဇာတ်ညွှန်းမျိုးဖြစ်နိုင်တယ်လို့လည်း ဖြေထားပါတယ်။ 'Omniscient Reader: The Prophet' မှာဆိုရင် BLACKPINK's Jisoo, Ahn Hyo Seop, Lee Min Ho လို တကယ့်နာမည်ကြီးတွေပါဝင်ထားပြီး မူရင်းဝတ္ထုမှာကတိုင် လူကြိုက်များတဲ့ဇာတ်အိမ်ပါ။ Jisoo သရုပ်ဆောင်ထားတာကြောင့်ပဲ ဒီကားထဲက ဇာတ်ကောင်လေးကို လူတွေပိုပြီးသိလာကြမှာကတော့ အမှန်ပါပဲ။

Source: KBIZoom